Дун цIадул кIкIвий гуро дунго цIа йиго,
ЦIадари гьелъие дир ракIги рухIги,
Цо гъанситоялъуб гьеб тIубаларо,
ТIолго дунялго гьелъ гвангъизе ккола.
Гьеб гъанситоги тун къватIиб кIанцIараб,
ЦIаялъ цо сумгицин бухIизе гьечIо,
ХIеренлъи чучлъизе, лъикIлъи цIикIкIине,
ЛъикIаб баракатгун баккун буго гьеб.
Жаниб цIаги чIинтIун чIегIераб кIкIвиялъ,
Бералги рухIун дун гIодулей гьечIо,
Дилъ Аллагьас лъураб баракатаб цIа,
Баракатгун цадахъ бикьулей йиго.
Кинаб гIаламатдай сонал анагIан,
Эркенлъуде цIалей йиго дун цIаялъ,
ЦIадулъ гIодой буссин бихьулеб гьечIо,
Гьалаглъун гучлъун гьеб борхулеб буго.
Гьеб свине теларин дир ракIги рухIги,
ХIалаккун цIадари къачIалел руго,
РакI гьалдолеб буго пикрабаз боркьун,
РухI бахунеб буго борхалъиялде.
Доба мугIрул тIогьиб тIадги гьеб буго,
ТIогьол майданазда гъорлъги гьеб буго,
Гьелъ рекIелъ рукъ ккураб цIа биинабун,
РацIцIалъуде цIала гIадамазул ракI.
Жеги гьеб цIаялъул гьалаглъиялъ дун,
Гьаб хъахIаб кагътихъе ахIулей йиго,
РухIарал, хIасратал мухъазулъги лъун,
Хинлъиги канлъиги бикьизе ине.